Bronwen Bowmer
Die spelers is oor die algemeen ongedisiplineerd en lyk nie juis geinteresseerd in die spel nie. Dit help ook nie as hulle afrigter hulle in die publiek uittrap nie, soos Koos van der Merwe keer op keer doen nie. Die WP hoop seker om die spulletjie reg te ruk met die aanstel van ‘n nuwe senior professionele afrigter wat verkies word.
Aansoeke om die pos het reeds gesluit en ons kan maar net hoop dat die nuwe aanstelling die span sal rigting gee en hul toekoms verbeter. Dalk wen hulle selfs teen die Sharks.
Ondervinding as as ‘n Super 12/14-afrigter is ‘n voorvereiste vir die pos. Rassie Erasmus en Gert Smal kom dan na vore as twee van die sterkste kandidate. Erasmus blyk die gunsteling te wees en as hy verkies word sal dit sekerlik top-spelers lok om by die WP span aan te sluit. Maar, Smal staan ook ‘n baie goeie kans.
Sy rekord lyk goed met die Curriebeker wat hy in 2000 en in 2001 verower het. Smal het ook die Stormers afgerig toe hulle die Super12-reeks in 2004 se halfeindronde gehaal het. Maar, onder Smal se afrigting, het die Stormers ook erg verloor. Die 14-75 nederlaag sal swaar teen hom tel as die finale besluit geneem word.
Die WP was eens op ‘n span om mee rekening te hou. Hulle het die Sharks al laat les op sê en die bulle met stert tussen die bene terug Gauteng toe gestuur. Is daar hoop vir die wit en blou? Hierdie aanstelling is duidelik baie belangrik en kan die span se wankelende reputasie maak of breek. Die ongedisiplineerde spul het ‘n sterk leier nodig om hulle weer op die pad na suksus te bring. Maar dit gaan ‘n dinamiese afrigter met uitstekende rugbykennis verg om die taak aan te vat.
|
