Buikdans is ‘n outentieke kunsvorm wat stam uit die Midde-Ooste. Dit was eerstens beoefen as ‘n vrugbaarheidsdans onder vroue om swangerskap aan te moedig en te vier. In latere jare is dit ook deur Burlesk dansers beoefen en aangepas vir ’n breër moderne gehoor wat graag dit saam met ‘n ontkleedans wil geniet.
By Madame Jojos is ons eerstens voorgestel aan Rosy Velvet, die sexy compère vir die aand wat deurgaans met haar balletskoene en pittigheid die gehoor op hul tone gehou het. Ek weet van geen ander balletdanser wat letterlik met vuur speel, terwyl sy deurgaans “sur la pointe” (op haar tone staan) en lyk of sy ten volle in beheer van sake is nie!
Die Australiese danseres Sapphira , hoof organiseerder van die geleentheid, was eerste aan die beurt en het glad nie doekies omgedraai met haar eerste dans nie. Haar pragtige, dog karige kostuum het vinnig verdwyn om vervang te word met ‘n dubbele volstruisveer waaierpalm wat haar nie-so-skaamheid moes bedek, terwyl sy die gehoor aanhits om hul waardering te wys. Sy het haarself bewys as ’n veelsydige danseres deur haar naeltjiedans op te volg met ’n tradisionele striptease vergesel met haar eie wonderlike sangstem.
Die tweede danseres vir die aand was Princess Farhana van Hollywood wat haar West End debuut gemaak het. Dis moeilik om te sê wat presies die gehoor die meeste betower het : haar wellustige vroulike liggaam, die eksotiese kostuums of die pure plesier en sensualiteit wat uit hierdie danser gestraal het. Wat wel duidelik was, was dat die Londen gehoor nie gewoond is aan hierdie bekoorlike styl van vermaak nie. Reaksie het gefaktureer tussen doodse stiltes en ‘n gejubel en gejuig vir meer.
Die enigste manlike buikdanser was Ozgen van Turkye. Van al die dansers het hy definitief die hardste gewerk om die gehoor oor te wen en dit het nie lank gevat voordat beide die mans en vrouens in die palm van sy hand was nie.
Volgens Shimmy Shake bevorder buikdans jou selfvertroue en vier die dans die menslike liggaam in al sy vorme en glorie. Londen kan doen met meer sulke geleenthede wat sorg vir n prettige aand vir enige gehoor.
Gaan na www.shimmyshakeshow.com vir meer inligting en bespreek jou kaartjies vir die volgende vertoning.
|
